Ол мемлекеттер арасында Қауіпсіздік кеңесі хатшыларының үшінші отырысын өткізуді ұсынды
Мемлекет басшысы Қасым-Жомарт Тоқаев Түркі мемлекеттері ұйымының Х саммитінде әлемдегі ахуалға ерекше тоқталып өтті, деп хабарлайды Sarbaz.kz.
«Қазір аумалы-төкпелі заман болып тұр. Халықаралық ахуал да тұрақсыз. Осындай алмағайып кезеңде түркі жұртының бірлігін бекемдей түсу аса маңызды. Бұл – ортақ қауіпсіздігіміздің сенімді кепілі. Қару-жарақ және есірткі саудасына, терроризм мен экстремизмге, көші-қонға қатысты сын-қатерлер көбейді. Мұндай қауіптердің алдын алу үшін қауіпсіздік саласындағы ынтымақтастықты нығайтуымыз керек», - деді Қасым-Жомарт Тоқаев.
Ол сөзін жалғай отырып, мемлекеттер арасында Қауіпсіздік кеңесі хатшыларының үшінші отырысын өткізуді ұсынды.
«Осы орайда мен келер жылы Астанада мемлекеттеріміздің Қауіпсіздік кеңесі хатшыларының үшінші отырысын өткізуді ұсынамын. Түркі мемлекеттерінің қаржылық тергеу органдары арасында қылмыспен бірге күресу және ақпарат алмасу туралы келісім жасау маңызды», - деді Президент.
