Астанада қауіпсіздік шаралары күшейтіледі
Астанада полиция күшейтілген жұмыс режиміне көшті. Елорданың айналасына жеті блокпост қойылды. Бұл туралы Sarbaz.kz Астананың полиция департаментінің баспасөз қызметіне сілтеме жасап хабарлайды.
«Мемлекет басшыларының қатысуымен ірі қоғамдық-саяси іс-шараларды өткізуге байланысты құқықтық тәртіп пен қауіпсіздікті қамтамасыз ету үшін қала полициясы қызмет атқарудың күшейтілген нұсқасына көшті», - делінген хабарламада.
Қала периметрі бойынша азаматтардың құжаттарын, сондай-ақ автокөліктерде тыйым салынған заттардың бар-жоғын тексеру үшін жеті тосқауыл қойылды. Полиция қала тұрғындары мен қонақтарына осы қауіпсіздік шараларына түсіністікпен қарауды сұрайды.
«31 қазан сағат 08:00-ден бастап қаланың периметрі бойынша Қарағанды, Қосшы, Көкшетау, Павлодар қалаларының, сондай-ақ Қорғалжын, Астраханка елді мекендерінің бағыттары бойынша және азаматтардың құжаттарын, сондай-ақ автокөліктердің тыйым салынған заттардың бар-жоғын тексеру үшін халықаралық әуежайға кіре берісте (қала тарапынан) жеті блокпост қойылады», - делінген хабарламада.
Естеріңізге сала кетейік, Ақорданың хабарлауынша, 1 қарашада Президент Қасым-Жомарт Тоқаевтың шақыруымен Франция көшбасшысы Эммануэль Макронның Қазақстанға ресми сапары өтеді.
2 қарашада Астанаға ресми сапармен Венгрия премьер-министрі Виктор Орбан келеді. Сапар барысында тараптар сауда-экономикалық, инвестициялық және мәдени-гуманитарлық салалардағы қазақ-венгр ынтымақтастығын одан әрі кеңейту мәселелерін талқылайды.
3 қарашада Астанада түркі мемлекеттері ұйымының саммиті өтеді. Іс-шараға мүше мемлекеттердің – Әзербайжан, Қырғызстан, Түркия, Өзбекстан басшылары қатысады. Сондай-ақ, саммит жұмысына Венгрия мен Түрікменстанның бақылаушы мемлекеттерінің көшбасшылары қатысады.
