Өрттің жанында «Шошқала» демалыс аймағы орналасқан
ҚР ТЖМ Абай облысындағы «Семей орманы» МОТР аумағындағы өрт туралы ақпарат жариялады, деп хабарлайды Sarbaz.kz.
Ведомствоның мәліметіне сәйкес, 15 шілде күні Абай облысы ТЖД «Семей орманы» МОТР қызметкерлерінен 11:40-та Беген орманшылығы аумағында құрғақ шөп пен ағаштардың жануы туралы ақпарат келіп түсті (57 және 58 орамдар).
«Сағат 11:52-де өрт орнына ТЖМ бөлімшелерінің күштері мен құралдары : облыстың ТЖД, ТЖМ 68303 әскери бөлімінің, ШҚО ТЖД жеке құрамдарының 100 адамы және 20-дан астам техникасы жіберілді.
Өртті жедел сөндіру жәрдемдесу мақсатында ТЖМ авиациясы жіберілді. Қазіргі уақытта «Семей орманы» МОТР ақпараты бойынша өрттің алдын ала ауданы 20 га құрайды», - делінген министрлік хабарламасында.
Ауа райы: +28 градус, солтүстік-батыс жел 16 м/с.
Өрттің жанында «Шошқала» демалыс аймағы орналасқан. ТЖД және ПД күштерімен түсіндіру жұмыстары жүргізілуде, ықтимал түтіндеуге байланысты демалыс аймағынан шығу ұсынылды.
