2023 жылы әскери спортшылар 340 медаль жеңіп алды
Фото: olympic.kz
Қорғаныс министрлігінің Спорт комитетінен 36 спортшы Олимпиада ойындарында өнер көрсетеді. Бұл туралы Қорғаныс министрінің орынбасары, генерал-лейтенант Сұлтан Камалетдинов мәлім етті, деп хабарлайды Sarbaz.kz. Париждегі жазғы Олимпиада ойындары 2024 жылдың 26 шілдесінен 11 тамызына дейінгі аралықта өтеді.
«2023 жылы әскери қызметші-спортшылар әртүрлі деңгейдегі 143 іс-шараға қатысып, барлығы 340 медаль иеленді. Оның 171-і – алтын, 82-і – күміс, 87-і – қола. 2024 жылы Париждегі Олимпиада ойындарында Қорғаныс министрлігінің Спорт комитетінен 36 спортшысы елдің намысын қорғауды жоспарлап отыр», - деді генерал-лейтенант Сұлтан Камалетдинов.
Спорт комитеті – ҚР Қорғаныс министрлігі армиясының орталық спорт клубы. Онда спорттың 20-дан аса түрін, балалар мен жасөспірімдер спорт мектептері мен орталықтарының желісін дамытады.
Сонымен қатар Сұлтан Камалетдинов келесі жылы әскери қызметшілердің жалақысын 30 пайызға өсетінін айтты.