Спорттық шарада бөлім басшылығы, офицерлер мен келісімшарт бойынша әскери қызметшілер 10 команда болып өзара сайысқа түсті
Фото: Шымкент гарнизонының баспасөз қызметі
Шымкенттегі «Оңтүстік» өңірлік қолбасшылығының 35748 әскери бөлімінде әскери қызметшілер мен олардың отбасылары арасында спорттық мереке өтті, деп хабарлайды Sarbaz.kz тілшісі Шымкент гарнизонының баспасөз қызметіне сілтеме жасап.
Іс-шара бригаданың спорт кешенінде әскери қызметшілердің отбасы мүшелері мен жұмысты ұйымдастыру қызметтің бастамасымен және бөлім басшылығының қолдауымен ұйымдастырылды.
Спорт мерекесі әскери отбасылар арасында дене шынықтыру және спорттық жұмысты жандандыруға, отбасылық қатынастардағы құндылықтарды тәрбиелеуге, өзара көмек, достық және бірлік сияқты жеке қасиеттерді қалыптастыруға, салауатты өмір салтын қалыптастыруға бағытталды.
Аталған іс-шараға бөлім басшылығы, офицерлер мен келісімшарт бойынша әскери қызметшілер 10 команда болып өзара сайысқа түсті.
Отбасылық-спорттық байқау 5 эстафеталық жарыстан тұрды. Онда қатысушылар күш пен ептілікті және төзімділікті көрсетті. Сайыс барысында орындықтардан сырғанап өтіп, доппен жасайтын жаттығулар, қаппен секіру және басқа да көптеген кедергілерден өту сияқты бағдарламалар қатысушылардың спортқа деген әлеуетін ашты.
Қатысушылар арасында жоғары деңгейде бәсекелестік орнап, байқау жеңімпаздары анықталды.
«Отбасылық қарым-қатынастарды дұрыс насихаттау, оның ішінде спорттық ойындарын ұйымдастыру және оған қатысу азаматтардың бірлігі, олардың ойын оң бағытқа бағыттау факторларының бірі болып саналады», - деп атап өтті 35748 әскери бөлімінің әскери қызметшілерінің отбасы мүшелерімен жұмысты ұйымдастыру қызметінің басшысы Жамал Оразбек.
Ұйымдастырушылар тарапынан жарысқа қатысушылардың барлығына грамоталар, медальдар мен сыйлықтар табысталды.
Сайыс қорытындысы бойынша, танк батальонының Құттыбаевтар отбасы қарсыластарынан мықты болып шықты. Екінші және үшінші орындарды барлау және медициналық роталарының Шәкір және Оспановтар отбасылары өзара бөлісті.