Ол Әскери-теңіз күштері бас қолбасшысының бірінші орынбасары болған
Фото: Қорғаныс министрлігі
Мемлекет басшысының өкімімен осы лауазымға генерал-майор Серік Жақсығалиұлы Борамбаев тағайындалды. Әскери-теңіз күштерінің бас қолбасшысын жеке құрамға таныстыра отырып, қорғаныс ведомствосының басшысы генерал-полковник Руслан Жақсылықов офицердің басшылық лауазымдардағы қызметте мол тәжірибесі бар екенін атап өтті. Бұл туралы Sarbaz.kz ведомствоның баспасөз қызметіне сілтеме жасап хабарлайды.
Серік Борамбаев Киев жоғары әскери-теңіз саяси училищесінің курсантынан Аумақтық қорғаныс департаментінің бастығы – ҚР Қарулы Күштері Бас штабы бастығының орынбасарына дейінгі мансаптық жолдан өтті. Қызыл Ту Каспий флотилиясының әскери бөлімдерінде қызмет етіп, Қазақстан Қарулы күштері Әскери-теңіз күштері бас қолбасшысының бірінші орынбасары болды, Қорғаныс министрлігінің Ақпарат және коммуникациялар, Тәрбие және идеологиялық жұмыстар департаменттерін басқарды.
Қорғаныс министрі кездесу соңында генерал-майор Серік Борамбаев әскери қауіпсіздікті және теңіз шекараларын берік қорғауды қамтамасыз ету ісінде ел басшылығы жүктеген міндетті ақтайтынына сенім білдірді.