Шамамен 10 келіге жуық мефедрон синтетикалық есірткі тәркіленді
Фото: picture-alliance/Geisler-Fotopress
Шымкент қаласы прокуратурасының үйлестіруімен Есірткі қылмысына қарсы іс қимыл басқармасы арнайы операция жүргізу барысында «Бозарық» шағын ауданында орналасқан жеке үйде синтетикалық есірткі дайындау зертханасы анықталды. Бұл туралы Sarbaz.kz тілшісі облыстық прокуратураның баспасөз қызметіне сілтеме жасап хабарлайды.
Аталған мекенжайды тінту кезінде зертханалық құрал-жабдықтар, прекурсорлар және өткізу мақсатында заңсыз дайындалған аса ірі көлемдегі синтетикалық есірткі заттары анықталды.
«Шамамен 10 келіге жуық мефедрон синтетикалық есірткі және 2 тонна көлемдегі прекурсорлар тәркіленді.
Аса iрi мөлшерде есірткі заттарды өткізу мақсатында заңсыз дайындау, қайта өңдеу, иемдену, сақтау, тасымалдау, өткізу фактісі бойынша ҚР ҚК 297-бабының 3-бөлігімен қылмыстық іс қозғалды.
Шымкент қаласының прокуратурасы азаматтарды бей-жай қалмауға және мұндай фактілер анықталған жағдайда, дереу 102 нөміріне хабарласуға шақырады.
ҚР ҚПК 201-бабының талаптарына сәйкес басқа ақпарат жария етуге жатпайды», - делінген хабарламада.