Пашинян ақпан айында елдің ҰҚШҰ-ға мүшелігін тоқтататынын мәлімдеген болатын
Фото: РИА Новости / Алексей Дружинин
Армения Ұжымдық қауіпсіздік туралы шарт ұйымынан шығатын болды. Бұл туралы парламенттегі үкімет сағатында Арменияның премьер-министрі Никол Пашинян мәлім етті, деп хабарлайды Sarbaz.kz тілшісі Euronews агенттігіне сілтеме жасап.
«Шығамыз. Қашан екенін шешеміз», - деді Пашинян.
Оппозициялық депутат Арменияның неліктен ҰҚШҰ-ға наразылығын білдіріп, ұйымнан шықпай отыр деген сауалына Пашинян осылай деп жауап берді.
«Біз ұйымға қайтып ораламыз деп ойлайсыз ба? Жоқ, енді басқа жолы жоқ. Уайымдамаңыз, біз кері қайтпаймыз», - деп қосты ол.
Өз кезегінде Арменияның сыртқы істер министрлігі Пашинянның сөзіне түсініктеме беріп, ол елдің ҰҚШҰ-дан шығатынын жарияламағанын айтты.
«Арменияның премьер-министрі біз ҰҚШҰ-дан шығамыз деп айтқан жоқ. Премьер-министр қашан шығатынымызды шешеміз, бірақ кері оралмаймыз деп мәлімдеді», - делінген хабарламада.
Ақпан айында Пашинян елдің ҰҚШҰ-ға мүшелігін тоқтататынын мәлімдеген болатын. Ал мамыр айының басында ел билігі ұйымды қаржыландыруға қатыспайтынын мәлімдеді.
Ал 11 маусым күні АҚШ пен Армения арасындағы қарым-қатынас стратегиялық серіктестік деңгейіне көтерілетіні хабарланды.
Осыған дейін Пашинян ҰҚШҰ Ереван алдындағы міндетін орындамағанын бірнеше рет тікелей мәлімдеген.