Израиль әскері ХАМАС-қа тиесілі деп есептеген ондаған нысанға соққы берді
Фото: Euronews
Израиль армиясы Газа секторының солтүстігіндегі Джабалия жерінде ХАМАС-қа қарсы құрлық операциясын бастады. БҰҰ Бас хатшысы Антониу Гутерриш кезекті рет атысты тоқтатуға шақырды. Бұл туралы Sarbaz.kz тілшісі Euronews агенттігіне сілтеме жасап хабарлайды.
Израиль армиясы бұған дейін аймақта ХАМАС мүшелерінің бар-жоғы және топтың лаңкестік инфрақұрылымын қалпына келтіру туралы барлау ақпараты алынғанын мәлімдеген.
Құрлық операциясы басталғанға дейін Израиль әскері жойғыш ұшақтар мен басқа да ұшақтар арқылы ХАМАС-қа тиесілі деп есептеген ондаған нысанға соққы берді. Ұйымның бірнеше мүшесі өлтірілгені хабарланды.
Өз кезегінде БҰҰ Бас хатшысы Антониу Гутерриш атысты тез арада тоқтатуға, кепілге алынғандарды толықтай босатуға және Палестина анклавына гуманитарлық көмекті арттыруға шақырды. Сонымен бірге, Гутерриш атысты тоқтату аймақтағы жағдайдың бастамасы ғана екенін атап өтті.
«Соғыс салдарынан болған қирандылар мен ауыр жағдайдан кейін қалыпты өмірге оралу ұзаққа созылады. Газа халқы аяққа тұрып, өмірлерін қайта бастау үшін гуманитарлық көмек пен ұзақ мерзімді даму жолында әртүрлі елдермен тығыз және терең серіктестіктерге мұқтаж болады», - деді Антониу Гутерриш.
Сондай-ақ Рафах қаласында да шайқастар жүріп жатыр, онда Израильге шабуыл жасауға дайындалып жатқан бірнеше туннель шахтасы мен зымыран тасығыштарды тауып, жойды. Мысырмен шекарада орналасқан Рафах қаласынан 300 мыңға жуық палестиналық қаладан қашып үлгерді. ХАМАС пен Израиль арасындағы қақтығыс Газаның Зейтун ауданында да жүріп жатыр.