Украина бізден әскер сұраған жоқ – НАТО-ның Бас хатшысы
Фото: Reuters
НАТО-ның Бас хатшысы Йенс Столтенберг Украинаның НАТО әскерін сұрамағанын, керісінше көбірек қолдау алғысы келетінін айтты. Бұл туралы Sarbaz.kz тілшісі TRT-ға сілтеме жасап хабарлайды.
Римде Италия премьер-министрі Джорджия Мелонимен кездескен Столтенберг кездесуден кейін Италияның «ANSA» агенттігіне баға берді.
Франция президенті Эммануэль Макрон көтерген «Украинаға НАТО әскерін орналастыру» идеясы туралы сұраққа Столтенберг былай деп жауап берді:
«НАТО-ның Украинаға күш енгізу ниеті жоқ. Мен Украинаға өткен аптада барғанымда украиналықтар НАТО әскерін сұраған жоқ. Олар көбірек қолдау алғысы келді.
Біз қазір Ресеймен мағыналы диалог жүргізу өте қиын екенін көріп отырмыз. Олардың басқа елге шабуыл жасауын доғарғанын қалаймыз. Украина мәселесінде бейбіт шешім қажет», - деді Столтенберг.
НАТО Бас хатшысы Украинаға «Samp/T» әуе қорғаныс жүйесін бергені үшін Италияға алғыс айтты.