Сарбаздар енді гранттар және несиелік демалыстар ала алады
2023 жылдан бастап мерзімді қызметтің беделін арттыру тетіктері, соның ішінде білім беру гранттары мен несиелік демалыстар енгізілді. Бұл туралы Қорғаныс министрінің орынбасары Дархан Ахмедиев Sarbaz.kz тілшісіне берген сұхбатында айтты.
«Егер армияда жақсы нәтиже көрсетсе, дене шынықтыру, ату, заңнаманы білу сияқты барлық пән бойынша және мінез-құлық жағынан жақсы көрсеткіштерге ие болса, мерзімді қызметтегі сарбаздардың ҰБТ тапсырмай университеттерге түсу мүмкіндігі бар. Егер сарбаз жақсы ұпай жинаса, оның университет есебінен грантқа түсу мүмкіндігі бар», – деді Ахмедиев.
Қорғаныс министрлігінің ІТ қоғамдастықпен кездесуі барысында гранттарды бөлу жүйесін әзірлейтін компания іріктелді.
«Бірақ бұл гранттарды ашық және дұрыс бөлу үшін жүйе қажет. Білім беру платформаларын цифрландырумен айналысатын көптеген компаниялар арасында конкурс өткіздік, – деді Дархан Ахмедиев.
Сарбаз өз бағаларын онлайн режимінде көре алатын, сондай-ақ оқу шарттары бар университеттер туралы қажетті материалдарды таба алатын платформаны қысқа мерзімде әзірлеген компания таңдалды. Бүгінгі таңда әскери қызметшілер арасында 3000 грант бөлінеді, алайда оларды министрліктің гранттары есебінен одан әрі кеңейту жоспарлануда.
Сарбаздар үшін тағы бір жаңалық – несиелік демалысты енгізу болды.
«Бұрын несие мәселесі әскерде де жалғасып, сарбаздың оны төлеуге мүмкіндігі болмайтын. Өткен жылдан бастап біз проактивті режимде өсімпұлды автоматты түрде тоқтатуға көмектесетін жүйені енгіздік», – деп бөлісті министрдің орынбасары.
Қазіргі таңда әскерге шақырылушы әскери комиссариатқа барғанда оған әскери бөлімге жіберу туралы бұйрық шығады. Бұрын бұл қағаз жүзінде тапсырылатын еді. Ал бүгінде бұл сарбаздардың ЖСН-ін несиелік бюроларға жіберетін жүйеде жасалады. Несиелік бюро мен Бірінші несиелік бюро осы бұйрықтарды алып, кімнің несиесі бар екенін анықтайды.
«Кредит төлеуді 1 жыл, 1 айға тоқтата тұру үшін бюро жиналған ақпаратты екінші деңгейлі банктерге немесе микро қаржылық ұйымдарға жібереді», – деді Ахмедиев.