АҚШ 36 мемлекетке талапты күшейтпек
Фото: Reuters
АҚШ-тың сауда министрлігі «қауіптілік деңгейі жоғары елдерге» атыс қаруын экспорттауға қатысты ережелерді күшейтті. Мұндай мемлекеттердің тізіміне Қазақстан, Қырғызстан және Тәжікстан кіреді. Бұл туралы Sarbaz.kz тілшісі TRT басылымына сілтеме жасап хабарлайды.
АҚШ сауда министрлігі 26 сәуірден бастап атыс қаруын, оқ-дәрілерді және қару-жарақ компоненттерін «қауіптілік деңгейі жоғары елдерге» деп аталатын елдерге экспорттау ережелерін күшейтті. Лицензиялау саясатын қатайту «аймақтық тұрақсыздықты, есірткі саудасын, адам құқықтарын бұзуды, саяси толқуларды және АҚШ-тың ұлттық қауіпсіздігіне нұқсан келтіретін басқа да әрекеттерді қоздыру» қаупін барынша азайтуға бағытталған.
«Сауда департаменті қылмыскерлердің, террористердің және есірткі картельдерінің Америка Құрама Штаттарында жасалған атыс қаруларына қол жеткізуін қиындата отырып, Американың ұлттық қауіпсіздігін қорғайды. Көбінесе экспортталған қару-жарақ дұрыс емес қолдарға түседі және АҚШ-тың ұлттық қауіпсіздігі мен сыртқы саяси мүдделеріне тікелей қайшы келетін мақсатта пайдаланылады», - деді АҚШ-тың сауда министрі Джина Раймондо.
Бұл шектеулер тек жеке компаниялармен мәмілелерге қатысты болады және 30 мамырдан бастап күшіне енеді.
АҚШ сауда министрлігінің «қауіптілік деңгейі жоғары елдер» тізіміне 36 мемлекет кіреді, оның ішінде Латын Америкасы (16 ел), Африка және Оңтүстік-Шығыс Азия (әрқайсысы сегіз ел), сондай-ақ Қазақстан, Қырғызстан және Тәжікстан енген Орталық Азия елдері бар. Тізімді жасау кезінде лаңкестік әрекеттер қаупі, сыбайлас жемқорлық деңгейі, адам құқықтарын сақтау және билік тұрақтылығы сияқты факторлар ескерілді.
Жаңа саясаттың бір бөлігі ретінде АҚШ сауда министрлігі тізімдегі елдердің жеке компанияларымен транзакцияларға «бас тарту презумпциясын» қолданады.
Бұған қоса, АҚШ билігі экспортқа шығарылатын қарудың қалай пайдаланылғаны туралы мәліметтерді жинауды күшейтіп, экспорттық лицензиялардың әрекет ету мерзімін төрт жылдан бір жылға дейін қысқартпақ.
Тізімдегі елдерге атыс қаруын экспорттауға берілген лицензиялар 1 шілдеден бастап жойылады.