Соңғы күндері Израиль үкіметінің басшысы әлем көшбасшыларымен телефон арқылы сөйлескен
Фото: Anadolu
Израиль премьер-министрі Биньямин Нетаньяху Газа секторындағы әскери әрекеті үшін Гаагадағы Халықаралық Қылмыстық Соттың тұтқындау туралы ордер шығаруы мүмкін екеніне қатты алаңдайды, деп жазады израильдік Maariv газеті. Бұл туралы Sarbaz.kz тілшісі Anadolu агенттігіне сілтеме жасап хабарлайды.
Басылымның мәліметінше, соңғы күндері Израиль үкіметінің басшысы әлем көшбасшыларымен, оның ішінде АҚШ президенті Джо Байденмен телефон арқылы сөйлесіп, осы мәселе бойынша оң нәтижеге қол жеткізуге тырысқан.
Нетаньяху оқиғалардың өршуіне жол бермеу үшін Ақ үй басшысына жанама қысым көрсетуге тырысқаны атап өтілді.
Халықаралық қылмыстық сот Израиль премьер-министрі Биньямин Нетаньяху мен жоғары лауазымды Израиль шенеуніктерін, оның ішінде қорғаныс министрі Йоав Галлантты қамауға алуға ордер беруге дайын. Бұл туралы ақпаратты бұған дейін израильдік бірқатар БАҚ таратқан болатын.
Айта кетейік, осыған дейін Оңтүстік Африка Израильге қатысты БҰҰ сотына бірнеше рет шағымданған. Нәтижесінде, Гаагадағы сот Израильге геноцидтің алдын алу шараларын қабылдауды міндеттеген болатын.