Хуситтер бүгінге дейін 50-ге тарта азаматтық кемеге шабуыл жасаған
Фото: Euronews
Йемендік хуситтер Қызыл теңіздегі сауда кемелеріне шабуыл жасауды қайта бастаған болуы мүмкін. Бұл туралы Sarbaz.kz тілшісі Euronews агенттігіне сілтеме жасап хабарлайды.
Еуропа мен Азия арасындағы негізгі кеме қатынасы бағытында, нақтысы Йемен жағалауындағы Баб-эль-Мандеб бұғазында жарылыс болды.
Хабарламаға сәйкес, жарылыс Джибутиден оңтүстік-шығысқа қарай 130 шақырым жерде сауда кемесінің маңында болған. Бұл туралы ақпаратты Біріккен Корольдіктің теңіз сауда операцияларымен айналысатын әскери бөлімшесі (UKMTO) таратты.
«Кеме экипажы қауіпсіз жерде. Билік тарапы тергеу жүргізіп жатыр», - делінген британ әскерлерінің мәлімдемесінде.
Бұл оқиға Иран тарапынан қолдау тапқан йемендік хуситтердің судағы халықаралық сауда жолы бойындағы әрекеттерін қайта жандандырғандарының дәлелі болуы мүмкін. Бірақ хуситтердің өзі бұл оқиғаға қатысы бар-жоғын нақты айтпаған.
2023 жылдың күзінен бастап олар ХАМАС-пен ынтымақтасып, бір кемені басып алып, тағы бір кемені суға батырып, шамамен 50 азаматтық кемеге зымыран және дронмен шабуыл жасады. Соңғы аптада АҚШ пен Ұлыбритания Йемендегі хуситтердің нысандарына әуе шабуылын жасағаннан кейін тыныштық орнады.
Бірақ қауіп сейілмегендіктен Қызыл теңіз бен Аден шығанағы арқылы теңіз жүк тасымалының көлемі айтарлықтай қысқарған.