Sarbaz.kz

Мәжіліс депутаттары палатаның жалпы отырысында жол қозғалысы туралы заңға түзетулер енгізді, деп хабарлайды Sarbaz.kz.

Мопед жүргізушілері Әкімшілік құқық бұзушылық туралы кодексте көзделген баптарға сәйкес толық жауапкершілікте болады. Бұл стандарт мопедтердің қатысуымен болатын жазатайым оқиғалар мен жарақаттардың санын азайтуға және мопедтерді мас күйінде жүргізуге жол бермеуге бағытталған. Сондай-ақ, мопед жүргізушілері мен көлік жүргізушілерін теңестіру жоспарланып отыр. Мопедтерді жүргізу үшін азаматтар уәкілетті органда міндетті тіркеуден өтеді, «А1» санатындағы жүргізуші куәлігін алады, жыл сайынғы техникалық байқаудан өтеді, сондай-ақ көлік құралдары жүргізушілерінің азаматтық-құқықтық жауапкершілігін міндетті сақтандырудан өтеді.

Жүргізуші куәлігі жоқ, бірақ көлік жүргізіп жол ережесін бұзғандар 7 жыл бойы куәлік ала алмайды

Түзетулер қабылданғаннан кейін жүргізуші куәлігі жоқ және алмаған, бірақ көлік құралын жүргізгені үшін жауапкершілікке тартылған, оның ішінде алкогольдік, есірткілік және/немесе масаң күйде болған адамдар 7 жыл ішінде жүргізуші куәлігін алу үшін емтихан тапсыруға жіберілмейді.

Денсаулыққа зиян келтірмеген деңгейде болған оқыс оқиға үшін жүргізуші куәлігінен айырмау мәселесі қарастырылады.

Көліктің орташа және максималды жылдамдығы туралы түсініктер енгізіледі. Бұл түзетулер жолдың барлық учаскесінде жүргізушілердің жылдамдығын төмендетуге бағытталған.

«Автокөліктің орташа жылдамдығы» республикалық маңызы бар автомобиль жолдарында көліктің жүріп өткен жолын жүріп өткен уақытына бөлу арқылы анықталады.

«Көлiк құралының ең жоғары жылдамдығы» – Қазақстан Республикасының заңнамалық актiлерiнде көзделген жағдайларды қоспағанда, рұқсат етiлген шектен асып кетуге тыйым салынатын жол қозғалысы ережелерiнде белгiленген жылдамдық.

Бұл ретте «орташа жылдамдық» көрсетілген құрылғылар мен құралдар арқылы жолдардың түзу учаскелерінде және айналма жолдары жоқ қала сыртында автоматты түрде есептеледі.

Сондай-ақ Әкімшілік құқықбұзушылық туралы кодекске көлік құралдарында белгіленген жылдамдықты 60 және одан да көп км/сағ асырғаны үшін 40 АЕК көлемінде айыппұл түріндегі қатаң әкімшілік жауапкершілік енгізіледі.