Sarbaz.kz

Қуандық Бишімбаев Салтанат Нүкеновамен бірге өмір сүрген уақыты туралы айтып берді, деп хабарлайды Sarbaz.kz.

Экс-министрдің айтуынша, үйлену тойынан кейін көп ұзамай Нүкенова қызмет бабы арқылы таныс адамдармен кездесіп жүргенін мойындаған. Оның айтуынша, Нүкенова Павлодар облысы әкімінің ұлы және ірі кәсіпкерлердің бірі саналатын үйленген жігітпен кездескен.

«Үйленгенімізден кейін 3-4 күн өткен соң, оның мінезі өзгеріп, ашуланып жүрді. Не болғанын сұрағанымда, кабинетімде суретте тұрған кісімен бір кездері жақын қатынаста болғанын айтты. Ол азаматтың отбасы, 4 баласы бар, одан 20 жасқа үлкен. Қазақстанға танымал адам. Аты – Райымбек. Мен ол кісімен жұмыстас болдым, танимын. Сол себепті қатты таңғалдым», - деді Бишімбаев.

Ол өз сөзінде Салтанаттың бұрынғы қарым-қатынастарына байланысты қызғанышпен қарады деген айып тағылғанын айтып өтті.

«Мен оны жамандау үшін айтып тұрғаным жоқ. Олар мені ойдан шығарылған қызғанышты бастан кешірді деп айыптайды. Мен алданып қана қоймай, бар шындықты айтпағаным үшін ұялдым әрі қатты ренжідім. Бұл бір фактімен ғана шектелмейді. Мен өзімді қорғауым керек. Салтанатты жамандағым келмейді, бірақ маған айып тағылды. Ал енді мен шындықты айтайын десем, үнсіз қалғанымды қалайды», — деп түсіндірді Бишімбаев.

Сот отырысында қорғаушылар көп ұзамай бұл куәлікке қарсылық білдірді.

«Сотталушы дәлелі жоқ нәрсеге сілтеме жасай алмайды деп санаймын. Мұның бәрі жәбірленушіні жамандауға бағытталған», - деді Нүкенованың ағасы.

Өз кезегінде судья тараптардың теңдігін сақтау қажеттігін алға тартты. Бишімбаев сөзін жалғастырды.

Экс-министрдің айтуынша, Салтанат осыны айтқаннан кейін қатты алаңдаған.

«Бұл сөздерді естігеннен кейін арамыздағы қарым-қатынас бұрынғыдай болмайды деп қатты алаңдады. Оны қалай сабырға шақырарымды білмедім», - деді Бишімбаев.

Бишімбаевтың айтуынша, Салтанат оны тым қатты бақылауына алған. Жиі қоңырау шалып, жауап бермесе, үйінен кетіп қалатынды шығарған.

«Мен жұмыстан үйге келе жатырмын, әріптесіммен кездескім келеді. Қоңырау шаламын, ескертемін, ана мекемеде мынандай адаммен бірге боламын, бір жарым сағат отырамыз деймін. Ол сол мекемеге қоңырау шалып, әкімшіге ақша беріп, бірге отырған суретімізді түсіруді сұрайды. Алғашында бұл қызық көрінетін, бірақ кейін құмарлығына айналды. Ол менің сонда отырғанымды білу үшін жарты сағаттан кейін келетін. Бұл жағдай жиі қайталанды», – дейді Бишімбаев.