Sarbaz.kz

Қазақстанда онлайн-несиелер енді биометриялық сәйкестендіруден кейін берілетін болады. Қаржы нарығын реттеу және дамыту агенттігі микрокредиттерді электрондық тәсілмен беру қағидаларына түзетулер жобасын әзірледі, деп хабарлайды Sarbaz.kz.

Жоба 8 сәуірге дейін жария талқылау үшін «Ашық НҚА» порталында орналастырылды.

Жобаға сәйкес микроқаржы ұйымы мен қарыз алушы арасында микрокредит беру туралы шарт жасасу, сондай-ақ оған өзгерістер мен толықтырулар енгізу биометриялық сәйкестендіруді қолдану арқылы жүзеге асырылатын болады.

Сондай-ақ, клиенттің ұялы телефонының абоненттік нөмірі немесе банк шотының деректемелері (терминалдар арқылы микрокредиттер беруді қоспағанда) туралы деректерге өзгерістер енгізу үшін клиентті Жеке кабинетте тіркеу кезінде азаматтан биометриялық деректер қажет болады. Бұл ретте банк шотының немесе төлем картасының клиентке тиесілі екенін сәйкестендіру мүмкін болмаған жағдайда ақша аудару жүзеге асырылмайды.

«Микрокредит беру туралы шарт жасасу, микроқаржылық қызметті жүзеге асыратын ұйым мен клиент арасында электрондық тәсілмен микрокредит беру туралы шартқа өзгерістер мен толықтырулар енгізу СДАО қызметтерін пайдалану арқылы биометриялық сәйкестендіруді қолдана отырып немесе микроқаржылық қызметті жүзеге асыратын ұйымның құрылғылары арқылы клиентті тіркеу кезінде алынған клиенттің биометриялық деректерін пайдалана отырып, жүзеге асырылады», - делінген жобада.

Биометриялық идентификаттау кезінде клиенттің қайталанбайтын бақылау қимыл-қозғалыстарын орындау тізбектілігін биометриялық идентификаттау барысында тексеру арқылы клиенттің биометриялық деректерін қолдан жасау үшін статикалық сурет немесе бейнежазбаны қолданудан қорғау қамтамасыз етіледі.

Сондай-ақ түзетулер клиентті биометриялық сәйкестендіру барысында алынған деректерді сақтау қауіпсіздігін қамтамасыз ету бойынша МҚҰ-ға қойылатын талаптарды белгілейді.

Әзірлеушілердің пікірінше, ұсынылған шаралар микрокредиттерді электронды түрде беру қауіпсіздігінің талаптарын күшейтеді.