Гаитиде жаппай тәртіпсіздіктер болып жатыр
Фото: AP Photo / Matias Delacroix
Гаитидегі қақтығыстардан кейін премьер-министр Ариэль Анри отставкаға кететінін мәлімдеді. Бұл туралы Sarbaz.kz тілшісі DW агенттігіне сілтеме жасап хабарлайды.
«Мен басқаратын үкімет бұл жағдайға бей-жай қарай алмайды. Өтпелі кеңес құрылғаннан кейін менің үкіметім дереу орнынан кетеді», - деді Анри видео хабарламада.
Ариэль Анри бұл мәлімдемені көршілес Ямайкада Кариб теңізі қауымдастығының (CARICOM) өкілдері мен АҚШ Мемлекеттік хатшысы Энтони Блинкеннің кездесуінен бірнеше сағат өткен соң жасады, онда Гаитиде өтпелі кеңес құру туралы шешім қабылданды. Анри Блинкенмен телефон арқылы сөйлескенде отставкаға кету туралы сөздерін растады.
Гаитидегі тәртіпсіздіктер ақпан айының соңында Анридің Кенияға сапары кезінде басталды. Гаитидегі халықаралық әуежайлардың жабылуына байланысты Анри үйіне орала алмады.
Ал Доминикан Республикасы Гаитиге және Гаитиден ұшатын ұшақтар үшін әуе кеңістігін жауып тастады.