Тінту барысында атыс және суық қару, сондай-ақ есірткі заттары табылды
Фото: Sputnik / Ирина Семибратова
Ұлттық қауіпсіздік комитеті прокуратураның үйлестіруімен 27 ақпанда бопсалау күдігі бойынша Ақмола облысының 2 тұрғынын ұстады. Бұл туралы Sarbaz.kz ведомствоның баспасөз қызметіне сілтеме жасап хабарлайды.
Ведомство мәліметіне сәйкес, тергеу материалдары бойынша, олар шетелдік «заңдағы ұрылар» деп аталатындардың қамқорлығымен кәсіпкерлерден ақша бопсалаумен айналысқан, осылайша «Бурабай» курорт аймағының бизнес субъектілеріне қылмыстық бақылау орнатуға тырысқан.
«Тінту барысында іс фигуранттарынан атыс және суық қару, сондай-ақ есірткі заттары алынды.
Қылмыстық кодекстің 194-бабы 3-бөлігінің 2-тармағы бойынша сотқа дейінгі тергеп-тексеру жүргізілуде. Соттың санкциясымен ұсталған адамдарға қамауда ұстау түріндегі бұлтартпау шарасы қолданылды.
Өзге ақпарат Қылмыстық-процестік кодекстің 201-бабы 1-бөлігіне сәйкес жария етуге жатпайды», - делінген хабарламада.