Sarbaz.kz

Газада ашаршылық құрбандарының саны артып келеді. Еуропа Одағы анклав тұрғындарына құрлық пен теңіз арқылы гуманитарлық көмек көрсету бағыттарын ашу үшін Израильге қысым жасап жатыр. Бұл туралы Sarbaz.kz тілшісі Euronews агенттігіне сілтеме жасап хабарлайды.

Газа секторында аштық пен шөлден 20 адам қайтыс болды. Мұндай деректерді ХАМАС тобы бақылайтын Палестинаның денсаулық сақтау министрлігі мәлімдеді.

ЕО Израильге теңіз және құрлық арқылы гуманитарлық көмек жеткізу маршруттарын ашу үшін қысымды күшейтті. Ұлыбританияның сыртқы істер министрі Дэвид Кэмерон Израиль одақтастарының сабырын сынап жатқанын мәлімдеді.

Израиль шенеуніктері Газаға Кипр арқылы теңіз жолымен азық-түлік түрінде көмек жеткізу нұсқаларын қарастырып жатқанын айтты.

Сәрсенбі күні кешке Газаның орталық бөлігінде кем дегенде 15 адам қаза тапқаны хабарланды. Дейр-эль-Балахтағы ғимараттарға екі әуе соққысы, тағы біреуі Нусейрат босқындар лагеріне жасалды.

Секторда қаза тапқан палестиналықтардың туыстары Нью-Йоркте БҰҰ басшысы Гутерришпен және БҰҰ Қауіпсіздік кеңесінің мүшелерімен жеке кездесті.

Имад Әл-Тамими, америкалық-палестиналық дәрігер:

«Бұл қайғылы жағдай. Бүгінге дейін әртүрлі миссияларға қатыстым, бірақ бұл менің өмірімдегі ең қорқыныштысы болды. Әрқайсысыңыздан бұл жағдайды тоқтату үшін қолдан келгеннің бәрін жасауды өтінемін.

Сіздер жағдайды тек теледидардан біліп отырсыздар. Ал біз Газада 13 күн өмір сүрдік, жағдай оңай емес», - деді.

Анклавтың бүкіл аумағында гуманитарлық жағдай ушығып тұр. Ал солтүстікте оқшауланып қалған 300 мың палестиналықтың өмірі тіптен қиын. Олар аман қалу үшін арамшөптермен және жануарларға арналған жем-шөппен қоректенуге мәжбүр.

БҰҰ мәліметтері бойынша, сектордың солтүстік аймақтарында тұратын екі жасқа дейінгі әрбір алтыншы бала аштыққа ұшырауда.