Ол 10 жылға дейін сотталуы мүмкін
Фото: Andy Dunaway/US Air Force/dpa/picture alliance
АҚШ Әскери-әуе күштерінің Азаматтық қызметкері құпия деректерді жариялады деген айыппен ұсталды. Тергеу мәліметтері бойынша, 63 жастағы Дэвид Слейтер Ресейдің Украинаға қарсы соғысына қатысты ақпаратты онлайн танысу қызметі арқылы жіберіп отырған. Бұл туралы Sarbaz.kz тілшісі DW басылымына сілтеме жасап хабарлайды.
Ол АҚШ армиясында қызмет етіп, подполковник шенімен отставкаға кеткен. Осыдан кейін ол Небраска штатындағы Оффатт әуе базасында АҚШ Қарулы күштерінің стратегиялық қолбасшылығында (USSTRATCOM) жұмыс істеді және шамамен 2021 жылдың тамызынан 2022 жылдың сәуіріне дейін құпия ақпаратқа қол жеткізді. Атап айтқанда, Ресей-Украина соғысына арналған брифингтерге қатысқан.
АҚШ Әділет министрлігінің ақпараты бойынша, осы брифингтерде алынған ақпаратты Дэвид Слейтер онлайн танысу қызметінде Украинада тұратын әйел ретінде көрсеткен адамға жіберген. Ол Слейтерден құпия деректер жіберіп тұруды сұрап, оны жеке хат-хабарларында «сүйікті құпия ақпарат беруші» және «құпия агент» деп атаған. USSTRATCOM қызметкері оған Ресейдің Украинаға шабуылына байланысты әскери мақсаттары мен әскери әлеуеті туралы ақпарат берді.
Слейтердің ісі бойынша алғашқы сот отырысы 5 наурызға белгіленді. Ол 10 жылға дейін бас бостандығынан айырылып, әрбір айып үшін 250 мың долларға дейін айыппұл төлейді.