Ол екі тарап арасында атысты тоқтату қандай жағдайда мүмкін болатынын айтты
Фото: IDF
АҚШ президенті Джо Байден Израильдің Рамазан айында ХАМАС-пен соғысты уақытша тоқтатуға келіскенін айтты. Бұл туралы Sarbaz.kz тілшісі Reuters агенттігіне сілтеме жасап хабарлайды.
Байден бұл туралы NBC арнасында айтты. Сол сияқты Израильдің ХАМАС-ты жою үшін алдымен Газа секторының оңтүстігіндегі Рафах қаласынан палестиналықтардың эвакуациялануына рұқсат беруге міндеттеме алғанын мәлім етті.
Байден сондай-ақ, кепілге алынғандар босатылғаннан кейін екі тарап арасында атысты тоқтату туралы келісім бар екенін айтты.
«Рамазан айы жақындап қалды. Бізге кепілге алынғандарды босатуға уақыт беру үшін израильдіктермен Рамазан айында ешқандай әрекетке бармайтыны туралы келісім жасалды», - деді ол.
Айта кетейік, 2024 жылы мұсылмандар үшін қасиетті болған Рамазан айы 10 наурыз күні кешке басталып, 9 сәуір күні кешке аяқталады.
Байденнің айтуынша, уақытша атысты тоқтату Израильдің көршілерімен қарым-қатынасын реттейді және палестиналықтардың мемлекет құруына мүмкіндік береді. Сол сияқты өзге де араб мемлекеттерімен қарым-қатынасқа да әсер ететінін айтты.
«Сауд Арабиясы Израильді мойындауға дайын. Иордания дайын. Египет, тағы алты мемлекет бар. Мен қазір Қатармен жұмыс істеп жатырмын», - деді Байден.