Ол ХАМАС қозғалысы жойылғаннан кейін Палестина тәуелсіз мемлекет болуы керек екенін айтты
Фото: РИА Новости
АҚШ президенті Джо Байден Палестина ұлттық әкімшілігі реформалануы және ХАМАС Газа секторындағы билігінен айырылған бойда тәуелсіз мемлекет құруға дайын болуы керек деді. Бұл туралы Sarbaz.kz тілшісі РИА агенттігіне сілтеме жасап хабарлайды.
«Иордан өзенінің батыс жағалауындағы және Газа секторындағы палестиналықтардың қажеттіліктерін тиімді қанағаттандыру үшін Палестина әкімшілігін шұғыл түрде реформалау қажет. ХАМАС-тың Газадағы билігі аяқталғаннан кейін олар бейбітшілікті жақтайтын мемлекет құруға дайын болуы керек», - деді ол Ақ үйде Иордания королі Абдалла II-мен кездесуінен кейінгі баспасөз мәслихатында.
ХАМАС қозғалысы 2007 жылы Газа секторын басып алғаннан кейін Батыс жағалаудың бір бөлігі ғана халықаралық мойындалған Палестина билігінің иелігінде қалды.
Айта кетейік, ХАМАС пен Израиль арасындағы қақтығыс өткен жылдың 7 қазанында басталған. Бүгінге дейін қақтығыс салдарынан 28 мыңға жуық палестиналық қаза болды.
Қазақстан Палестинаға алғашқыда 1 млн доллар көлемінде көмек берген болатын. Кейінірек қосымша 38 тоннадан аса гуманитарлық көмек жіберілетіні хабарланған. Сол сияқты Газа секторынан эвакуацияланған қазақстандықтар отбасыларымен бірге Алматыға жеткізілген болатын.