Ол Газада ХАМАС-пен еш байланысы жоқ мыңдаған отбасы бар екенін де айтып өтті
Фото: Anadolu
АҚШ-тың мемлекеттік хатшысы Энтони Блинкен Израиль премьер-министрі Биньямин Нетаньяхумен кездесуінде Израиль армиясының әрекетінен Газа секторында бейбіт тұрғындар тым көп қаза болғанын айтты. Бұл туралы Sarbaz.kz тілшісі Anadolu агенттігіне сілтеме жасап хабарлайды.
Энтони Блинкен өз сөзінде өмірінің соңына дейін Газа секторында қаза болған мыңдаған баланы ұмытпайтынын айтты.
АҚШ-тың мемхатшысы 7 қазандағы шабуылдан есеңгіреп қалғанын, алайда Газада ХАМАС-пен еш байланысы жоқ мыңдаған отбасы бар екенін де айтып өтті. Сондай-ақ, ол ХАМАС бейбіт тұрғындардың қазасына жауапты деп санайды.
Ол Израиль шенеуніктерімен кездесу барысында Газа секторындағы бейбіт тұрғындардың жағдайына көңіл бөлу, оларды қорғау және аймаққа гуманитарлық қолжетімділікті барынша арттыру мәселелері талқыланғанын айтты.
«2 миллионға жуық адам үйін тастап кетуге мәжбүр болды. Жүздеген мың адам аштық жағдайында өмір сүріп жатыр. Көптеген адам жақындарынан айырылды. Күн сайын қаншама жазықсыз адам өліп жатыр», - деді Блинкен.
Айта кетейік, Израиль ХАМАС-тың соғысты тоқтату туралы ұсынысынан бас тартқаны хабарланған.