Құтқарушылар таудың баурайына үй салуға болмайтынын мәлімдеді
Фото: ҚР ТЖМ
8 ақпанда сағат 02.20-да Алматы қаласы Медеу ауданының Тау-Самал шағын ауданында алдын ала ақпарат бойынша техногендік сипаттағы топырақтың ылғалдануынан сырғыма түсті. Бұл туралы Sarbaz.kz ҚР Төтенше жағдайлар министрлігінің баспасөз қызметіне сілтеме жасап хабарлайды.
Министрлік мәліметіне қарағанда, оқиға орнына Қазселденқорғаудың, Алматы қаласы 109 құтқару қызметінің, Республикалық жедел-құтқару жасағының, Алматы ТЖД күштері мен құралдары жіберілді. Оқиға орнына келген кезде сырғыма салдарынан екі үйге зақым келгені анықталды.
«Оқиға орнында ТЖД басшылығы бар. ТЖМ Республикалық жедел-құтқару жасағының құтқарушылары тексеру жүргізуде.
Жағдайды талдауға сәйкес, қардың едәуір мөлшерінің түсуіне байланысты орта таулы және биік таулы аймақтарда таулардың беткейлеріндегі қардың тұрақсыздығына байланысты қар көшкіні қаупі бар», - делінген министрлік хабарламасында.
Айта кетейік, жылжыма – бұл еріген, жаңбыр немесе жер асты суларының балшық тәрізді күйге қанығуына байланысты ауырлық күшінің әсерінен төмен қарай жылжыған тереңдігі бір метрге дейінгі қуаты аз топырақ қабатының жолағы.
«Алматы қаласы ТЖД және Қазселденқорғау сырғыма қаупі бар учаскелерде тұрғын үйлер салуды ұсынбайды.
Таудың баурайына үй салу, жолдарды кесу, жоспарлау жұмыстары үшін кесу ұсынылмайды.
Ашық септиктерді, дәретханаларды және басқаларын пайдалануға тыйым салынады. Тұрғын үй алаптарының иелеріне, бау-бақша және саяжай қоғамдарының басшыларына су құбырлары мен суару құбырларының, септиктердің жағдайын үнемі қадағалап отыру ұсынылады», - деп жазады ведомство.