Хуситтер Қызыл теңіздегі бұл әрекетін Газа секторындағы палестиналықтарға көмектесу үшін жасайтынын хабарлады
Фото: Khaled Abdullah / REUTERS
Йемендік хуситтер Ұлыбританияның теңіз қауіпсіздігін қамтамасыз ететін Ambrey компаниясының Қызыл теңіздегі сауда кемесін зымыранмен атқылады. Салдарынан кеме бортында жарылыс болды. Бұл туралы Sarbaz.kz тілшісі EADaily агенттігіне сілтеме жасап хабарлайды.
«Йеменнен атылған зымыран жағалауда тұрған сауда кемесіне тиді», - деп жазды Ambrey компаниясы.
Осыған дейін Йеменнің солтүстігін басқаратын хуситтер Израильге бет алған америкалық сауда кемесін зымыранмен атқылаған болатын. Алайда көп ұзамай америкалық әскерилер хуситтер ұшырған зымыранның жойылғанын мәлімдеді.
Айта кетейік, хуситтер Қызыл теңіздегі бұл әрекетін Газа секторындағы палестиналықтарға көмектесу үшін жасайтынын хабарлады.
EurAsia Daily басылымының жазуынша, араб және өзге де мұсылман елдері ескерту жасаған. Бұл ескертуде Израильдің Газа секторындағы әрекетіне кез келген елдің қолдау көрсетуі қақтығыстың бүкіл аймаққа таралуына алып келетіні айтылған.