Ол әуежайлар маңындағы заңсыз салынған нысандардың ұшу қауіпсіздігіне кедергі келтіретінін айтты
Фото: Primeminister.kz
Әуежайлардағы арнайы техникалар мен жабдықтардың 50 пайызы тозған. Бұл туралы Көлік министрі Марат Қарабаев Үкімет отырысында мәлім етті, деп хабарлайды Sarbaz.kz тілшісі.
«Әуежайлардағы арнайы техникалар мен жабдықтарға тоқталатын болсақ, олардың тозу деңгейі 50 пайызды құрайды. Сондықтан барлық әуежайларда мобильділігі төмен жолаушыларға қажетті жағдайларды қамтамасыз ету үшін мүгедектер арбасын және амбулифт сатып алу маңызды болып тұр. Бұл жобаларды қаржыландыру жұмыстары жеке әуежайлар үшін өз қаражаты немесе жеңілдетілген несиелер есебінен атқарылатын болады. Ал мемлекеттік әуежайлар үшін Қаржы министрлігімен бірлесіп, бюджеттен қаржы бөлу мәселесін пысықтаудамыз», - деді Көлік министрі.
Сонымен қатар ол әуежайлар маңындағы заңсыз салынған нысандардың ұшу қауіпсіздігіне кедергі келтіретінін, осы бойынша әкімдіктер арнайы шара қолдануы керектігін атап өтті.
«Биыл әуежай аумақтарында жаңа нысандардың пайда болуына жол бермейтін заңнамалық өзгерістер қабылданды. Осыған байланысты әкімдіктер әуежай маңындағы заңсыз құрылысқа жол бермеуге ерекше назар аударып, бұрын берілген жер учаскелерін мемлекетке қайтару жөнінде шаралар қабылдау қажет», - деді Марат Қарабаев.