Жер сілкінісі 18 желтоқсан күні болды
Фото: BBC
Қытайдың солтүстік-батысында болған 6,2 баллдық жер сілкінісінен 118 адам қаза болды. Сол сияқты тағы 250-ден аса адам жарақат алды. Бұл туралы Sarbaz.kz тілшісі BBC агенттігіне сілтеме жасап хабарлайды.
Дүйсенбі, яғни 18 желтоқсан күні кешке Қытайдың Ганьсу провинциясының Цзисишань округінде 6,2 баллдық жер сілкінісі болды.
Жер сілкінісіне көмек көрсету штабында хабарланғандай, эпицентр екі провинция арасындағы шекарадан небәрі 5 км қашықтықта орналасқан. Цинхайдың көптеген ауданында қатты дүмпулер болды.
Осыған дейін белгілі болғандай, эпицентр шамамен үш миллион адам тұратын Ланьчжоу қаласынан (Ганьсу провинциясы) оңтүстік-батысқа қарай 101 км қашықтықта орналасқан. Ошағы 10 км тереңдікте жатты.
Қытай басшысы Си Цзиньпин «іздестіру-құтқару жұмыстарын жүргізу, жаралыларды уақытылы емдеу және қаза болғандар санын азайту үшін бар күш-жігерін салу керек» деді.
Жер сілкінісінің эпицентрі болған Цзисишань округінің билігі 5 мыңға жуық ғимараттар мен құрылыстарға зақым келгенін хабарлады.