АҚШ әскери кемесі үш дронды атып түсірді
Фото: AP
Йемендік хуситтер атқан баллистикалық зымырандар 3 желтоқсан күні Қызыл теңіздегі үш коммерциялық кемеге түсті. Ал АҚШ әскери кемесі өзін-өзі қорғау үшін үш дронды атып түсірді. Екі шабуылға қатысты жауапкершілікті Иран тарапынан қолдау көретін хуситтер өз мойнына алды, деп хабарлайды Sarbaz.kz тілшісі Associated Press агенттігіне сілтеме жасап.
Бұл соққылар Израиль мен ХАМАС арасындағы жағдайды ушықтыра түсті. Ал бүгінге дейінгі қақтығыстарда алғаш рет бірнеше кеме бір хусит шабуылына ұшырады. Агенттіктің хабарлауынша, АҚШ шабуылдан кейін Тегеранға қатысты тиісті шаралар қарастыруға уәде берді.
«Бұл шабуылдар халықаралық сауда мен теңіз қауіпсіздігіне тікелей қауіп төндіреді. Олар әлемнің бірнеше елінің өкілдерінен тұратын халықаралық экипаждардың өміріне қауіп төндірді. Сондай-ақ, бұл шабуылдарды Йемендегі хуситтер жасағанымен, Иран толығымен ұйымдастырды деп сенуге толық негіз бар», — дейді АҚШ Қарулы Күштерінің Орталық қолбасшылығы.