Дәмханалардың біріне жарылғыш зат қойылғаны туралы қоңырау түскен
Фото: Sputnik / Тимур Батыршин
Шымкентте бомба туралы жалған ақпарат таратқан ер адам 1 жылға бас бостандығынан айырылды, деп хабарлайды Sarbaz.kz.
Жалған ақпарат таратқан күдікті 49 жастағы Түркістан облысының тұрғыны болып шықты. Сотталушы ҚР ҚК-нің 273-бабында көзделген қылмыстық құқық бұзушылықты жасағаны үшін кінәлі деп танылып, соттың шешімімен 1 жылға бас бостандығынан айрылды.
Тәртіп сақшылары терроризм актісі туралы көрінеу жалған ақпарат тарату қауіпті қылмыс болып табылатынын және 5 мың айлық есептік көрсеткішке дейінгі мөлшерде айыппұл салуға немесе сол мөлшерде түзеу жұмыстарына тартуға, не 5 жылға бас бостандығынан айыруға немесе шектеуге әкеп соғатынын ескертеді.
«Полицияның «102» арнасына қаладағы дәмханалардың біріне жарылғыш зат қойылғаны туралы қоңырау келіп түсті. Хабарламаны алған полицейлер дереу оқиға орнына барды. Құқық қорғау органдары мүдделі қызметтермен бірге ғимараттан барлық келушілер мен қызметкерлерді эвакуациялады. Тексеру нәтижесінде қоғамдық тамақтану мекемесінен жарылғыш зат табылған жоқ» - делінген Шымкент қаласы полиция департаментінің баспасөз қызметі таратқан ақпаратта.