Балаларға ойыншықтар, үстел ойындары мен тәттілер тарту етті
Қорғаныс министрлігінің әскери жоғары оқу орнының курсанттары «Жанашыр жүрек» акциясын өткізді, деп хабарлайды Sarbaz.kz.
Республика күні қарсаңында Радиоэлектроника және байланыс әскери-инженерлік институтының курсанттары облыстық балаларды қолдау орталығының тәрбиеленушілерін қуантты.
Мекемеде әрқилы тағдыр тәлкегіне тап болған балалар бар. Сондықтан болар, олар әскери киім киген жастармен қауышқанда ерекше тебіреністе болды.
Курсанттар да орталыққа құр қол келген жоқ. Олар тәлімгерлерге ойыншықтар, үстел ойындары мен тәттілер тарту етті.
«Бұл орталықта әртүрлі жағдайға байланысты ата-ана қамқорлығынан айырылған балалар тұрады. Оларға осылайша жан жылуын сыйлай алатынымызға қуаныштымыз. Бұл мекемемен байланысты нығайтқымыз келеді, өйткені сыйлықтардан басқа, балаларға әскери мамандық туралы әңгімелеп, олардың көкжиегін кеңейте аламыз», – деп атап өтті курсант Имамәлі Досполов.
Кездесу соңында акцияны ұйымдастырушылар концерт қойып берді.
Қазақстанның Қарулы Күштерінде қайырымдылық шараларын өткізу жақсы дәстүрге айналып отыр. Әскери қызметшілер Ұлы Отан соғысының ардагерлеріне, зейнеткерлерге, мүмкіндігі шектеулі адамдарға, ерекше білім беруді қажет ететін балаларға қол ұшын береді. Олармен әрдайым байланыста болу, үй шаруаларына көмектесу, іс-шараларды, концерттер мен экскурсияларды ұйымдастыру балаларға қиындықты, жалғыздықты және сырқатты жеңуге ықпал етері анық.