Оқиға 21 қазан күні болған
Фото ашық дереккөзден
Оралда студент қыз сегізінші қабаттан секіріп кетті. Ол қазір жансақтау бөлімінде, жағдайы өте ауыр күйде жатыр, деп хабарлайды Sarbaz.kz.
БҚО полиция департаменті таратқан хабарламаға жүгінсек, оқиға 21 қазан күні болған.
«Сағат 13.20 шамасында 1-курста оқитын 17 жастағы қыз жатақхананың 8-қабатынан секіріп кеткен. Салдарынан ауыр жарақат алған студент Орал қаласындағы облыстық көпбейінді ауруханаға жатқызылды. Аталған дерек бойынша Орал қаласы полиция басқармасының Абай полиция бөлімі ҚР ҚК 105-бабы 3-бөлігіне сәйкес (өзін-өзі өлтіруге дейін жеткізу) сотқа дейінгі тергеу амалдарын жүргізуде. Қазіргі кезде оқиғаның мән-жайы анықталып жатыр», деп хабарлады ведомстводан.
БҚО денсаулық сақтау басқармасы баспасөз қызметінің хабарлауынша, сағат 13.40-та Ж.Досмұхамедов көшесі бойындағы жатақханадан облыстық жедел медициналық жәрдем станциясына қоңырау шалынған. Студент қыз бастапқыда жақын жерде болғандықтан, облыстық көпбейінді ауруханаға жеткізілген. Кейін облыстық көпбейінді балалар ауруханасына жатқызылды. Қазір жансақтау бөлімінде, жағдайы өте ауыр. Балалар нейрохирургінің, травматологтың және хирургтың бақылауында.