Ұсталған адам әскери нысандарды суретке түсіріп, ақпаратты Ресей елшілігіне беріп отырған
Фото: Kai Remmers/dpa/picture alliance
Румынияда Ресейдің пайдасына тыңшылық жасады деген күдікпен Румын азаматы ұсталды. Бұл туралы Бухаресттегі прокурорлар мәлім етті, деп хабарлайды Sarbaz.kz тілшісі DW газетіне сілтеме жасап.
Ведомствоның мәліметінше, ұсталған адам 2022 жылдан бері Румыния шекарасында Тулча қаласының маңында әскери нысандарды суретке түсіріп, Румыния мен НАТО-ның басқа да елдерінің әскерлері мен техникаларының тасымалдануын қадағалап, ақпаратты Бухаресттегі Ресей елшілігіне беріп келген.
Сот шешімімен ресейлік тыңшы 30 тәулікке тергеу изоляторына орналастырылды. Тергеуді SRI мемлекеттік қауіпсіздік қызметімен және Румынияның әскери барлауымен бірге ұйымдасқан қылмыс пен терроризмге қарсы күреске жауапты Румыния прокуратурасының DIICOT арнайы бөлімі жүргізеді.
DIICOT күдіктінің үйін тінту кезінде дәлелдер табылғанын хабарлады.
Тулча қаласы Дунай атырабында Украинамен шекарадан 7,5 км қашықтықта орналасқан. Бұл қаладан Украинаға көлік жолдары, соның ішінде Дунай арқылы өтеді.