Sarbaz.kz

Гонконгтың барлау агенттігімен ынтымақтастық жасады деп айыпталған 37 жастағы британдық бұрынғы теңіз жаяу әскері өлі күйінде табылды, деп хабарлайды Sarbaz.kz тілшісі ВВС агенттігіне сілтеме жасап.

Мэттью Трикеттің денесін кездейсоқ өтіп бара жатқан адам жексенбіде Лондон маңындағы Мейденхед қаласындағы саябақта тапты. Полиция бұл туралы сейсенбіде жариялады.

Трикеттің өлімі ресми түрде «түсініксіз жағдайдағы өлім» деп танылды және полиция жариялағандай, оның себептерін істі жүргізу кезінде анықтауға тырысады.

Трикет Мейденхедте тұрып, иммиграциялық шенеунік болып жұмыс істеген. Осы уақытқа дейін корольдік теңіз жаяу әскерінде алты жыл қызмет еткен. Сонымен қатар ол MTR Consultancy қауіпсіздік фирмасының директоры болды.

13 мамырда оған және (қытай ұлтының өкілі) Ұлыбританияның тағы екі тұрғынына Лондонның Вестминстер магистраттар сотында өткен жылдың 20 желтоқсанынан бастап осы жылдың 2 мамырына дейін ақпарат жинау, қадағалау және басқа да заңсыз әрекеттер түрінде шетелдік Гонконг барлауымен ынтымақтастық жасады деген ресми айып тағылды.

Бұл ретте айыпталушылар қамауға алынбады, бірақ 24 мамырда басталуы тиіс сотқа жіберілді. Судья Луиза Сьесиора оларға тек шетелге шығуға, үйден кешкі сағат 10-нан таңғы 5-ке дейін шығуға тыйым салды және полицияда белгіленіп тұруға бұйрық берді.

Мамыр айының басында полиция бұл іс бойынша Ұлыбританияның әртүрлі жерлерінде 11 адамды ұстады, бірақ олардың көпшілігі айыпсыз босатылды.

Магистратттар сотының отырысында айыпталушылар тек өз есімдерін атады және басқа ештеңе айтпады.

«Біз бұл жаңалыққа таң қалдық және оның отбасын мүмкіндігінше қолдаймыз», – деді Трикеттің адвокаты Джулиан Хейс журналистерге.

Сейсенбі күні кешке Мейденхедтегі Гренфелл саябағында жексенбі күні кешке Трикеттің денесі табылған жерде қара полиция шатыры тұрды.

Магистраттар сотының отырысында прокурор Трикетті өзінің қауіпсіздігі үшін қамауға алуды сұрады, ол ұсталғаннан кейін өзіне-өзі қол жұмсауы мүмкін екенін түсіндірді. Алайда судья прокурордың сөзінен бас тартты.

Бейжің Гонконгтың барлау агенттіктерінің Трикет пен компанияға қатысы бар деген айыптауларды жоққа шығарды, ал Гонконгтың өзі ресми мәлімдемеде Ұлыбритания билігінен іс туралы егжей-тегжейлі ақпарат талап еткенін және жауап күтетінін хабарлады.