Еуроодақ Украинаға Ресейдің бұғатталған активтерінен түскен кірістерінен көмектесуді мақұлдады
Фото: 123RF/adrianhancu
Ресей Банкінің Еуропалық Одақ елдеріндегі бұғатталған активтерінен түскен қаражат Украинаға 2024 жылдың шілдесінен бастап беріле бастайды. Төлем жылына екі рет жүргізіледі. Бұл туралы Sarbaz.kz тілшісі Еурокомиссия сайтына сілтеме жасап хабарлайды.
Қаражатты бөлу жыл сайын қайта қаралатын болады. Ал бірінші қайта қарау 2025 жылдың 1 қаңтарында өтетінін хабарлады Еурокомиссия.
«ЕО Украинаның ең шұғыл қажеттіліктеріне бейімделуі үшін заңды түрде негізделген және икемді жолды таңдады», – деді Еурокомиссия төрағасының орынбасары, еуро және әлеуметтік диалог жөніндегі еурокомиссар Валдис Домбровскис.
Оның айтуынша, Еурокомиссия алғашқы төлем шілде айында жасалуы үшін бар күшін салуды жалғастырады.
Осы жылы алынған қаражаттың 90 пайызы еуропалық бейбітшілік қоры арқылы әскери көмек ретінде бөлу жоспарлануда. Қалған 10 пайызы ЕО бюджетіне Украинаны ұзақ мерзімді қолдау бағдарламасы бойынша, соның ішінде соғыс аяқталғаннан кейін елді қалпына келтіру үшін бөлінетінін хабарлады Еурокомиссия.
Бұған дейін Еуропалық Одақ Украинаны қолдау және қалпына келтіру үшін Ресейдің Орталық Банкінің бұғатталған активтерінен түскен пайданы пайдалануды мақұлдағаны белгілі болды. ЕО-да Ресей Федерациясының шамамен 210 миллиард еуро активтері бұғатталды. 2024 жылы осы активтерден түсетін кірістер 3 миллиард еуроға дейін жетеді деп күтілуде.
«Киевке 2024 жылдың 15 ақпанынан бастап алынған активтерден таза пайда беріледі», – деп жазады Bloomberg агенттігі.
Осы күннен бастап Ресейдің бұғатталған активтері шамамен 557 миллион еуро пайда әкелді, бұл Бельгияның Euroclear депозитарийінің бірінші тоқсандағы есебінен туындап отыр. Bloomberg мәліметтері бойынша, Ресей Федерациясының бұғатталған активтері жыл сайын шамамен 5 миллиард еуро пайда әкелуі мүмкін.
«Депозитарий 15 ақпанға дейін алынған пайданы әртүрлі, соның ішінде Ресейдегі сот процестерін жабу үшін сақтайды», – деп түсіндіреді Bloomberg.
Брюссельдің жоспары Euroclear-ге күтпеген мәселелерді шешу үшін олардың көлемі жеткіліксіз болса, көбірек қаражат ұстауға мүмкіндік беретін механизмді қамтымақ.