Sarbaz.kz

Германия өзінің НАТО-дағы серіктесі Латвияны одан әрі әскери жағынан қолдауға сенім білдірді, деп хабарлайды Sarbaz.kz тілшісі DW газетіне сілтеме жасап.

«Балтық жағалауы елдерінің қауіпсіздігі – бұл біздің қауіпсіздігіміз», – деді ГФР Қорғаныс министрі Борис Писториус Лиелвард маңындағы Латвия әуе базасына жасаған сапарында.

Германия әскери-әуе күштерінің ұшақтары үш Балтық елінің әуе кеңістігін бақылауға қатысуды жалғастыратынын атап өтті Германия қорғаныс ведомствосының басшысы.

«Біздің ынтымақтастығымыз берік», – деп қосты ол.

НАТО-ның Балтық елдерінің әуе кеңістігін патрульдеу миссиясы 2004 жылдың наурызында Латвия, Литва және Эстония Солтүстік Атлантикалық альянсқа кіргеннен кейін басталды. Наурыз айынан бастап бұл бағдарламаны Германия басқарады. Лиелвард маңындағы әскери аэродромда 5 көп мақсатты Eurofighter Typhoon жауынгері және 200-ге жуық сарбаз орналасқан. Көктемнің басынан бері бұл ұшақтар дабылмен аспанға 13 рет көтеріліп, Балтық теңізінің үстінен ресейлік әскери ұшақтарды тапты. Латвия Қорғаныс министрі Андрис Спрудс Берлинге миссияны басқарғаны үшін алғыс айтты.

Сонымен қатар Писториус ГФР одақтастарын Украинаға зениттік зымыран кешендерін жеткізуге шақырды. Министр Берлиннің серіктестері Киевке PATRIOT жүйелерін немесе оның баламасын мүмкіндігінше тезірек жеткізуі керектігін атап өтті.

«Мұндай көмек Украинаның жауынгерлік рухы, қауіпсіздігі мен инфрақұрылымы үшін өте маңызды. Германия Украинаға өзінің PATRIOT жүйелерінің 25 пайызын берді. Бұл басқа елдерге қарағанда көбірек», – деді ГФР Қорғаныс министрі.

Писториус басқа мемлекеттердің Киевке әскери көмек көрсетуде неге баяу екенін түсінбейтінін жеткізді.

Латвиядан кейін Германияның қорғаныс министрі Литваға барып, әріптесі Лауринас Касчюнаспен кездесті. Сонымен қатар Писториус неміс әскери қызметшілерімен кездесіп, әскери жаттығуларға қатысуға ниет білдірді.