БҰҰ мәліметтері бойынша Ауғанстанда 1000-нан аса үй қираған
Фото: AFP
Ауғанстанның солтүстік-шығысындағы қатты нөсерден болған жойқын су тасқынынан 300-ден астам адам қаза тапты. Елді билеуші «Талибан» қозғалысының мәліметі бойынша, 12 мамыр, жексенбіде қаза тапқандар саны 315-ке жетіп, 1600-ден астам адам жарақат алды, деп хабарлайды Sarbaz.kz тілшісі БҰҰ баспасөз қызметіне сілтеме жасап.
Ауғанстанның Ішкі істер министрлігі хабарлағандай, басқа аймақтарға қарағанда, 10 мамырда басталған су тасқынынан үш провинция, яғни Бағлан, Тахар және Бадахшан провинциялары қатты зардап шеккен.
Бір күн бұрын ведомство табиғи апаттан 153 адам құрбан болғанын хабарлады. БҰҰ-ның Дүниежүзілік азық-түлік бағдарламасының өкілдері апат салдарынан 1000-нан астам үй қирағанын және зардап шеккен аудандардың көпшілігіне жүк көліктерінің жете алмай жатқанын атап өтті.
Save The Children халықаралық қайырымдылық ұйымы табиғи апаттан, әсіресе, балалардың көбірек зардап шегетінін ескертті. Ұйымның мәліметінше, Бағлан провинциясының ең көп зардап шеккен бес ауданында 600 000 адам тұрады, оның 310 000-ы бала.