Sarbaz.kz

АҚШ-тың Израильдегі елшілігі Иранның қауіп-қатерінен қорғау мақсатында өз қызметкерлерінің қозғалысын шектеп, Иерусалимнен, Тель-Авивтен және Бершебадан тыс жерлерге шығуға тыйым салды, деп хабарлайды Sarbaz.kz тілшісі британдық BBC медиакомпаниясына сілтеме жасап. 

АҚШ Мемлекеттік департаментінің өкілі Мэттью Миллер журналистермен сөйлескенде мұндай сақтық шараларының немен байланысты екенін ашып айтпады.

«АҚШ Таяу Шығыста, әсіресе, Израильде қауіп-қатерлерді мұқият қадағалап отыр», - деді ол.

Бір күн бұрын АҚШ президенті Джо Байден Иран Сирия астанасы Дамаскідегі Иран консулдығында Иран Ислам революциясы Сақшылар корпусы командирлерінің жақында өлтірілуіне жауап ретінде Израильдегі нысандарға соққы беруді жоспарлап отырғанын айтты. Ақ үйдің басшысы осы қауіп-қатерлерге байланысты Американың Израильді қолдайтынын айтты.

Американдық The Wall Street Journal (WSJ) газетінің хабарлауынша, Израиль алдағы 24-48 сағат ішінде Ираннан тікелей шабуыл күтеді. Елдің оңтүстігі немесе солтүстігі шабуылға ұшырайды деп болжануда. Сонымен қатар Axios ақпараттық ресурсының көздері ирандық шабуыл аймақтағы жағдайдың шиеленісуіне жол бермеу үшін шектеулі болады деп атап өтті.

1 сәуірде Израиль авиациясы Иранның Дамаскідегі консулдығына соққы берді. ИИРС-нің жеті мүшесі, соның ішінде Әл-Кудс арнайы күштерінің командирі, генерал Мұхаммед Реза Захеди мен генерал Мұхаммед Хади қажы Рахими қаза тапты. Оқиғадан кейін Иранның рухани жетекшісі Аятолла Әли Хаменеи «сионистік режим жазаланады» деп мәлімдеді.

7 сәуірде Хаменеяның әскери кеңесшісі Израиль елшіліктерінің ешқайсысы «енді қауіпсіз емес» деп қорқытты. Израиль Премьер-министрі Беньямин Нетаньяху Израиль кез келген жауапқа дайын екенін айтты.

«Бізге кім зиян тигізсе немесе зиян тигізуді жоспарласа, біз де оларға зиян тигіземіз», - деп ескертті ол.