Бұл аннекцияны мойындамаған еуропалық саясаткерлер Ресейді Халықаралық заңдарды бұзды деп айыптады
Фото: iz.ru
18 наурыз күні Халықаралық заңдарға қайшылығына қарамастан, Ресейдің Қырымды өзіне қосып алғанына тура 10 жыл болды, деп хабарлайды Sarbaz.kz тілшісі.
2014 жылдың 16 наурызында дауыс беру кезінде ресейлік БАҚ-тардың мәліметінше, Қырым тұрғындарының шамамен 97 пайызы референдумда түбектің Ресей Федерациясына кіруін қолдаған. Бұл – шамамен 1,2 миллион адам. Ал бұл мәліметті әлемдік БАҚ растаған жоқ.
Дауыстарды санау келесі күні өтті, ал тағы бір күннен кейін – 2014 жылдың 18 наурызында – Ресей Федерациясының президенті Владимир Путин Қырым басшылығымен келісімге қол қойды. Қол қою Үлкен Кремль сарайының Георгиевский залында өтті. Шартқа сәйкес, Ресей Федерациясында екі жаңа субъект пайда болды – Қырым Республикасы және Федералды бағыныстағы қала Севастополь.
Содан бері тура он жыл өтті.
Алайда Батыс елдері Қырымның Ресейге қосылуын заңсыз деп атады. Еуропалық саясаткерлер референдумды мойындамайтындарын мәлімдеп, Ресейді халықаралық заңдылықты бұзды деп айыптады, Қырымды Украинаға қайтаруды талап етті. Алайда Ресей Федерациясы 2022 жылдан бері Украинаның тағы бірнеше аймағын басып алды.