Базаны қалпына келтіру ұзаққа созылуы мүмкін
Фото: ArmyTimes
АҚШ-тың Маршалл аралдарының бірі саналатын – Рой-Намурда су тасқыны болып, аймақтағы әскери базаның бір бөлігін су шайып кетті. Бұл туралы Sarbaz.kz тілшісі ArmyTimes-қа сілтеме жасап хабарлайды.
Табиғи апат туралы Facebook-те Кваджалейн атоллында орналасқан АҚШ армиясының гарнизоны хабарлады. Су тасқыны аралдың солтүстік-батыс бөлігін басып қалып, кем дегенде үштен бірі су астында қалды.
«Бұл оқиға аралдың тарихындағы ең қиын кезеңдердің бірі ретінде тарихта қалады. Қиындықты шешіп, қалпына келтіруге дайындалып жатырмыз. Табиғи апаттан болған зардап бірнеше айға, тіпті бірнеше жылға созылуы мүмкін», – деді гарнизон командирі полковник Дрю Морган.
Оның айтуынша, бірнеше адам жеңіл жарақат алған. Рой-Намур аралын мекендеп жүрген 80-ге жуық адам жақын маңдағы аралға эвакуацияланды.
Аймақтағы әскери базаның мәліметіне сәйкес, Кваджалейн мен Рой Намур аралдарында шамамен 1300 америкалық тұрады. Олар – АҚШ-тың әскери қызметшілері, қорғаныс министрлігінің қызметкерлері және мердігерлер. Кваджалейн атоллында АҚШ армиясының ғарыштық және зымыранға қарсы қорғаныс қолбасшылығының сынақ полигоны орналасқан.