Бұл туралы премьер-министр Риши Сунак Киевке сапарында мәлімдеді
Фото: AP Photo
Ұлыбританияның премьер-министрі Риши Сунак Украина президенті Зеленскиймен кездесу қарсаңында бұл елге 2024-2025 жылдары 2,5 миллиард фунт стерлинг көлемінде әскери көмек берілетінін мәлімдеді. Бұл алдыңғы екі жылмен салыстырғанда 200 миллион фунтқа көп. Бұл туралы Sarbaz.kz тілшісі Ұлыбритания үкіметіне сілтеме жасап хабарлайды.
Бұл қаржы Украинаның Ресеймен соғыста жеңіске жетуі үшін бөлінеді. Нақтырақ айтқанда бұл қаражат алыс қашықтықтағы зымырандарды, әуе қорғанысы, артиллериялық оқ-дәрілер және теңіздегі қауіпсіздік сияқты маңызды салаларда пайдалануға қажет техникаларға жұмсалмақ.
2,5 миллиард фунттың кем дегенде 200 миллионы Украина үшін мыңдаған әскери дрондарды, оның ішінде барлау, соққы және теңіз дрондарын жедел сатып алуға және өндіруге жұмсалады. Осы технологиялар арқылы Украина өз азаматтарын қорғап, құрлық және теңіз арқылы басып кіріп жатқан ресейлік күштерге соққы бермек.
Дрондардың көп бөлігі Ұлыбританияда шығарылады деп күтілуде, ал елдің қорғаныс министрлігі Украинаға жеткізілетін дрондардың санын едәуір арттыру үшін халықаралық серіктестермен жұмыс істемек.
«Ұлыбритания қазірдің өзінде Украинаның ең жақын серіктестерінің бірі болып саналады, өйткені біз олардың қауіпсіздігі – біздің қауіпсіздігіміз. Тиісінше, әскери көмегімізді арттырамыз, мыңдаған жаңа дрондар жеткіземіз және Украинаға ұзақ мерзімді кепілдік беру үшін жаңа тарихи қауіпсіздік келісіміне қол қоямыз» – деді премьер-министр Риши Сунак.
Ұлыбритания бүгінге дейін Украинаға 12 миллиард фунттан астам қаражат бөлді.