Оның хабарламасын Қарулы күштердің қолбасшысы қолдады
Швеция Қарулы Күштердің Бас қолбасшысы генерал Микаэль Байден. Фото: AFP
Швецияда қорғаныс министрлігінің жоғары лауазымды екі қызметкері соғысқа дайын болуға шақырды. Бұл туралы Sarbaz.kz тілшісі BBC-ге сілтеме жасап хабарлайды.
Азаматтық қорғаныс министрі Карл-Оскар Болин қорғаныс конференциясында «Швецияда соғыс болуы мүмкін» деп мәлімдеді. Оның бұл сөзін Қарулы Күштердің Бас қолбасшысы генерал Микаэль Байден қолдады, әрі швед халқы бұл жағдайға моральды тұрғыдан дайын болуы керек екенін ескертті.
Дегенмен оппозициялық саясаткерлер бұл ескертуге қарсылық білдірді.
Бұрынғы премьер-министр Магдалена Андерссон қауіпсіздік жағдайы ауыр болғанымен, бұл соғыс бүгін-ертең болады дегенді білдірмейді деді.
Айта кетейік, Швеция НАТО-ның қорғаныс альянсына кірудің алдында тұр. Швеция бұл ретте Түркия Парламентінің және Венгрияның рұқсатын күтіп отыр.
Украина президенті Владимир Зеленский конференция барысында Швецияны өз елімен және басқа елдермен қару-жарақ өндірісінде жұмыс істеуге және бірге күшейуге шақырды.