Қару-жарақты толықтыруға қаражаттың болмауы қолдауды уақытша тоқтатуға әкелуі мүмкін екен
Фото: WSJ
Пентагонның баспасөз хатшысы генерал-майор Пэт Райдер бейсенбідегі баспасөз мәслихатында АҚШ-та Украинаға жіберілген қару-жарақты ауыстыруға қаражат қалмағанын мәлімдеді, деп хабарлайды Sarbaz.kz тілшісі Defence News-ке сілтемемен.
«Бізде ақша таусылды», - деді Райдер тілшілерге.
Райдер мұндай көмекті жіберу үшін 4,2 миллиард доллар қалғанын түсіндірді. Бірақ қару-жарақты толықтыруға қаражаттың болмауы қолдауды уақытша тоқтатуға әкелуі мүмкін екенін меңзеді. Өйткені Пентагон америкаық күштердің жауынгерлік дайындығына қауіп төндіргісі келмейді.
Конгресстегі федералды үкімет бюджеті туралы пікірталастар мен Ақ үйдің Украинаны одан әрі қаржыландыру туралы өтініштері аясында әкімшілік шенеуніктері бірнеше ай бойы осындай нәтиже туралы ескерткен болатын.
Сенаторлар тобы 100 миллиард долларлық шығындар туралы заң жобасын ашудың кілті ретінде қарастырылатын шекара қауіпсіздігі жөнінде келісім тұрғысында келіссөздер жүргізуде. Оның жартысынан көбі, яғни 60 миллиард доллар Украинаны қолдауға жұмсалуы керек.
Желтоқсан айының соңында Пентагон негізінен артиллерия мен басқа да оқ-дәрілерден тұратын 250 миллион долларлық Украинаға 2023 жылғы соңғы көмек пакетін жариялаған болатын.