Лаңкестік әрекетті экстремистік ұйымның екі жанкештісі жасаған
Фото: IRNA
«Ислам мемлекеті» экстремистік ұйымы Иранның Керман қаласында 100-ден аса адамның өмірін жалмаған жарылыстың жауапкершілігін өз мойнына алды, деп хабарлайды Sarbaz.kz тілшісі Reuters-ке сілтеме жасап.
Лаңкестік әрекеттің сипаттамасын «ИМ» өкілдері (Қазақстанда тыйым салынған ұйым) өз телеграм арналарында жариялады. Хабарламаларда айтылғандай, «ИМ»-ның екі мүшесі сәрсенбіде Иранның оңтүстік-шығысындағы Керман қаласында Касем Сүлейманидің зиратына жиналған жұртшылық арасында өздерін жарып жіберген.
«Ислам мемлекетімен» байланысты «Амак» жаңалық агенттігінің мәлімдемесі. Фото: t.me/directorate4
Жарылыстан 100-ден аса адам көз жұмып, 284 адам жараланды. Жарақат алғандардың арасында балалар да бар.
Жарылыс 3 қаңтар күні Касем Сүлейманидің қабірінің алдында аза тұту шеруі өткен зиратқа кіре берісте болған. Ислам революциясы Сақшылар корпусының (КСИР) командирі Касем Сүлеймани 2020 жылы Бағдад әуежайының маңында АҚШ-тың зымыран соққысынан қаза тапқан болатын.