Премьер-Министр жағажайларда бақылау камераларын орнату мәселесін пысықтауды тапсырды
Фото: istockphoto.com
Үкімет отырысы барысында шомылу маусымында су айдындарындағы жағдайды бақылау үшін жаңа технологиялар қолданудағы өңірлердің жетістігі атап өтілді. Бұл туралы Sarbaz.kz Үкіметтің баспасөз қызметіне сілтеме жасап хабарлайды.
«Өткен жылы қабылданған шаралардың арқасында суға батқандар саны 6%-ға азайды. Бірқатар оң мысалдарды айтып өткім келеді. Алматы және Павлодар қалаларында жүзіп бару шекарасын байқауға және суға батып бара жатқандарды ерте анықтауға мүмкіндік беретін қашықтан мониторинг жасау жүйесі пилоттық режимде сынақтан өтті. Ақтөбе облысында суға батып бара жатқан адамға батырма арқылы көмек шақыру сигналын жіберуге мүмкіндік беретін интерактивті қалқыма жобасы әзірленді», — деп атап өтті Олжас Бектенов.
Сондай-ақ өңір әкімдіктері осы тәжірибені зерделеп, пайдалануы қажеттігін атап өтті.
Сонымен қатар Премьер-Министр жағажайларда бақылау камераларын орнату және тиісті бағдарламалық қамтамасыз ету мәселесін пысықтауды тапсырды.