Уильям Бернс Газа секторындағы барлық кепілге алынған адамдарды босатуды және екі айлық атысты тоқтатуды қамтитын келісім аясында Израиль мен ХАМАС арасындағы келіспеушіліктерді жоюға үміттенеді.
Фото: Reuters
АҚШ президенті Джо Байден Орталық барлау басқармасының директоры Уильям Дж.Бернсті ХАМАС пен Израиль арасында мәміле жасауға көмектесу үшін жіберуді жоспарлап отыр. Бұл туралы Sarbaz.kz тілшісі Washington Post-қа сілтеме жасап хабарлайды.
Мәміледе Газа секторында кепілге алынған адамдарды босату және атысты тоқтату мәселесі қарастырылған.
Дж.Бернс Еуропаға келіссөздер жүргізу үшін және Израиль мен Египеттің барлау басшылары – Дэвид Барнимен, Аббас Камельмен, сондай-ақ Катардың премьер-министрі Мұхаммед бен Абделрахман Аль Танимен кездесуге барады деп жоспарланып отыр.
Египет пен Катар Израиль мен ХАМАС арасында келіссөздер жүргізді. Олардың бірлесе атқарған жұмысының нәтижесінде кепілге алынған адамдар босатылып, атыс уақытша тоқтатылған.
Айта кетейік, ХАМАС пен Израиль арасындағы қақтығыс бойынша қазір де келіссөздер жүріп жатыр. Израиль өз кезегінде соғысты 60 күнге тоқтату, 100-ден астам тұтқынды босату және қаза тапқандардың сүйектерін қайтару туралы ұсыныс жасаған.