Ана тілі эстон тілі болып саналмайтын жауынгердің көпшілігі Вирус батальонына жиналған
Фото: France Diplomatie - MEAE / JUDITH LITVINE
Эстония қорғаныс күштері дивизиясының қолбасшысы, генерал-майор Вейко-Велло Пальм ел Қарулы Күштерінің батальондарының бірінде орыс тілді сарбаздардың көптігіне алаңдайтынын айтты, деп хабарлайды Sarbaz.kz тілшісі Sputnik Радио басылымына сілтеме жасап.
Генералдың айтуынша, әскерге шақырылушыларға қызмет орнын таңдауға мүмкіндік беру осындай мәселеге әкеліп отыр.
«Әрине, (Эстонияның Шығыс қалалары – ред.) Йыхви, Кохтла-Ярве және Нарва сарбаздары үйлеріне жақын жерде қызмет етуді жөн көрді. Ал бір сәтте Вирус батальонындағы орыс тілді сарбаздар эстон тілділерге қарағанда көбірек болып шықты. Бірақ қазір біз бұл мәселені шешіп, әскерге шақырылушыларды жан-жаққа жіберіп жатырмыз», - деді ол Sakala басылымына берген сұхбатында.
Вейко-Велло Пальм ана тілі эстон тілі болып саналмайтын жауынгердің көпшілігі Вирус батальонына негізінен Таллин қаласынан келетінін айтты. Дегенмен олармен орыс тілінде сөйлеспейтінін атап өтті қолбасшы.
Бұған дейін Эстония премьер-министрі Кайа Каллас осы елде тұрып жатқан ресейліктерге дауыс беруге тыйым салудың жолын табуға уәде берген болатын.