Лавров: Украинадағы француз әскері – РФ үшін «заңды нысана»

Ресей СІМ басшысы Конгоға сапары кезінде Украинадағы француз әскери қызметшілері олардың мәртебесіне қарамастан Ресей әскери күштері үшін «заңды нысана» екенін айтты, деп хабарлайды Sarbaz.kz тілшісі Еуроньюс агенттігіне сілтеме жасап.

Украинада сарбаздарды оқытатын француз әскери нұсқаушылары ресейлік соққылар үшін «заңды нысана» болады. Бұл туралы Ресей Федерациясының Сыртқы істер министрі Франция Украина армиясына нұсқаушылар жібере алады деген хабарламалар аясында мәлімдеді.

Сергей Лавров бұл мәлімдемені Конго Республикасының Сыртқы істер министрі Жан-Клод Гакоссомен Африкадағы соңғы турының бір бөлігі ретінде бірлескен баспасөз мәслихатында жасады.

«Француз нұсқаушыларына келетін болсақ, менің ойымша, бұл туралы көптеген нақты фактілер бар, олар қазірдің өзінде Украинада жұмыс істейді», – деді Лавров.

Қазіргі уақытта Украина аумағында француз әскері жоқ, бірақ өткен аптада Киев бұл мәселе бойынша Парижбен келіссөздер жүргізіп жатқанын мәлімдеді.