КХДР көшбасшысы зымыран қаруын шығаратын зауыттарға барды
Солтүстік Кореяның бірқатар әскери зауытын аралаған КХДР көшбасшысы Ким Чен Ын зымыран қаруының өндірісінде болып, броньды машинаны өзі басқарып көрді. Бұл туралы Sarbaz.kz тілшісі Кореяның орталық телеграф агенттігіне сілтеме жасап хабарлайды.
«Ким Чен Ын Корея Халық армиясы басым әскери күшке ие болуы керек екенін, кез келген уақытта кез келген соғысқа дайын болуы керек екенін, сондықтан жау тарапы қарулы күштерді қолдануға батылы бармауы керектігін, ал шабуыл болған жағдайда жауды жеңуге дайын болуы керектігін айтты», - делінген Кореяның орталық телеграф агенттігінің ақпаратында.
КХДР көшбасшысы Армияны соғысқа дайындау туралы сегізінші шақырылымдағы Кореяның Еңбек партиясы Орталық әскери комитетінің жетінші кеңейтілген отырысындағы идеяларды жүзеге асыруда әскери зауыттардың рөлі маңызды екенін тағы да еске салды. Ким Чен Ын тактикалық зымыран ұшыру машиналарын шығаратын зауытқа да барды. Онда ол ірі калибрлі жауынгерлік броньды машиналар мен басқарылатын зымыран зеңбіректерін шығаратын зауыттардың жұмысын өз көзімен көрді.
Ким Чен Ын тактикалық зымыран зауытына өнімділікті күрт арттыруды тапсырды. Ол сондай-ақ басқарылатын реактивті зеңбірек снарядтарының өндірісін экспоненциалды түрде өсіру өзекті міндет екенін айтты.
«Ол жаңа көпфункционалды броньды машинаны жеке өзі басқара отырып, оның жауынгерлік қабілеттілігімен және ұтқырлығымен танысты. Біздің үлгідегі көпфункционалды жауынгерлік броньды машиналарды әзірлеу кезінде тактикалық-техникалық сипаттамаларды жақсартуды тапсырды», - деп хабарлады агенттік.
Тамыз айының басында Ким Чен Ын ауыр артиллерия мен реактивті зеңбіректерге арналған ірі калибрлі снарядтар, атыс қаруы, қанатты зымырандар мен дрондарға арналған қозғалтқыштар шығаратын зауыттардың жұмысын тексерген болатын.
