Зеленский АҚШ-тан тезірек көмек көрсетуді сұрады
Украина президенті Владимир Зеленский америкалық PBS телекомпаниясына берген сұхбатында Украинаның Қарулы Күштерінде әуе шабуылына қарсы қорғаныс әскерлерінің зымырандары таусылғандықтан ресейлік әскерлер Киев маңындағы Триполь жылу электр станциясын жойып жібергенін айтты. Украина президентінің айтуынша, бұл – АҚШ Конгресінің Киевке кезекті көмек пакетін бөлуді неліктен тезірек мақұлдауы керектігін көрсететін мысал. Бұл туралы Sarbaz.kz тілшісі BBC агенттігіне сілтеме жасап хабарлайды.
АҚШ Конгресінің спикері Майк Джонсон Украина президентіне жауап берді.
Америкалық БАҚ-тың ақпаратына қарағанда, Джонсон Украина, Израиль және Тайвань қауіпсіздігін қаржыландыру туралы заңды төрт түрлі заң жобасына бөлуді ұсынады. Беделді The Hill басылымының сұхбаттасушыларының айтуынша, жоспарда барлық төрт заң жобасын түзетулер енгізуге мүмкіндік беретін бір рәсімдік норма арқылы жүргізу қарастырылған.
Палата заң шығарушыларының бірінің айтуынша, ұлттық қауіпсіздікке қатысты төртінші заң жобасы TikTok әлеуметтік желісін бұғаттауды, сондай-ақ АҚШ-қа бұғатталған ресейлік активтерді Украинаға көмектесу үшін пайдалануға мүмкіндік беретін ережені қамтиды.
АҚШ Сенаты ақпан айында Украинаға, Израильге және Тайваньға 95 млрд доллар болатын (оның 60 млрд доллары Украинаға арналған) көмек пакетін мақұлдады.
Алайда Конгрестегі Дональд Трамптың жақтастары және олар тағайындаған спикер Джонсон бұл заңды қолдаудан бас тартып, Украинаға ақша бөлуді Мексика шекарасы арқылы өтетін көші-қонмен, сұйытылған газ экспортын лицензиялаумен байланыстыруды талап етті. Жақында олар жаңа шарт қойды – несиеге көмектің бір бөлігін рәсімдеу.
Украина өткен жылдың желтоқсан айынан бері АҚШ-тан тұрақты түрде көмек ала алмай келеді. Наурызда Пентагон Украина Қарулы Күштеріне 300 миллион доллар тұратын шағын пакет жіберді (ол бұрынғы келісімшарттарды орындау кезінде үнемделген қаражат есебінен жасалған), бірақ америкалық және украиналық шенеуніктердің айтуынша, бұл – жеткіліксіз.
Конгрестің дер кезінде көмек бөлуге қауқарсыз болуының нәтижесінде Украинаның Қарулы Күштерінде оқ-дәрілер жетіспей жатыр. Ал Украинаның шығысындағы ресейлік әскерлер шабуылын жалғастыруда. Іс жүзінде күн сайын салыстырмалы түрде шағын, бірақ маңызды көрсеткіштерге қол жеткізіп жатыр.
«Мен сіздерге ашық айтайын. Бұл көмексіз біз жеңіске жете алмаймыз, - деді Зеленский америкалық көмек пакеті туралы. – Жауыңнан әлдеқайда күшті болуың керек. Мен осыны меңзеп отырмын. Бүгінде артиллериялық снарядтар жеткіліксіз. Біз мұндай жағдайда ұзаққа бара аламыз ба? Жоқ. Қалай болғанда да, осы статистикамен олар бізді күн сайын артқа жылжытып отырады. Егер біз өзімізді 100 пайыз қорғағымыз келсе, біз сан жағынан теңесуіміз керек», - деді ол.
Зеленский сондай-ақ Конгрестегі президенттік сайлауға қатысты америкалық көмек бөлу туралы саяси дауларды қатаң сынға алды.
PBS тілшісінің Украина мен Израильге бөлінетін көмекті бөлісу ниеті туралы сұрағына жауап ретінде былай деді: «бұл қауіпсіздік мәселесі емес деген сөз» деп жауап берді.
«Бұл таза саясат. Шынымды айтсам, бұл әлем үшін ұят. Демократияға, демократия туралы айтқандардың бәріне ұят. Егер Конгресс бұл көмекті израильдік және украиналық деп бөлетін болса, онда бұл АҚШ-тағы сайлау мәселесі», - деп мәлімдеді Зеленский.
«Бұл Украинада күн сайын қанша адам қаза болғанына бәрі бір екенін білдіреді. Бұл олар үшін өздерінің рейтингі маңызды екенінің белгісі. Олар өлгендердің рейтингі болмайтынын естен шығарды», - деді ол.
Украинаға АҚШ-тан әскери көмек алудың қаншалықты маңызды екенін көрсету үшін Зеленский жақында ресейлік әскерлердің Киев облысындағы ең ірі Триполь жылу электр станциясын қалай жойып жібергені туралы айтып берді.
Фото: BBC
11 сәуірде Ресей Украинаның энергетикалық инфрақұрылымына кезекті жаппай соққы жасады. Оның ішінде Киев, Черкасск және Житомир облыстарына электр энергиясын жеткізетін Триполь ЖЭС толығымен қираған. Станцияда әрқайсысының қуаты 300 МВт болатын төрт шаң көмірлі және екі газ-мазутты энергоблок орналасқан.
«Өте қарапайым бір мысал келтірейін. Триполь станциясында. Ал Киев өңіріндегі жарық соған қарап отыр. 11 зымыран ұшырылды. Алғашқы жетеуін атып түсірдік. Төртеуі Трипольені жойып жіберді. Неге? Өйткені бізде зымыран жоқ. Бізде Трипольені қорғаған барлық зымыран таусылды», - деп мәлімдеді Зеленский.
Триполье ЖЭС-ін жоюға Украинаның зениттік зымырандарының жетіспеушілігі себеп болғанын немістің Bild газетінің тілшісі Джулиан Рёпке де жазды.
«Бірнеше апта бұрын айтқанымдай (және маған ешкім де сенбеді), Украинада Patriot және IRIS-T жүйелеріне арналған зымырандар таусылды. Бұдан басқа, қорларының көп бөлігі бітуге шақ қалды немесе жойылды. Батыс елдерінің қоймаларында жүздеген жүйелер мен мыңдаған зымырандар жатқанына қарамастан осындай жағдайға ұшырадық. Айтарға сөз жоқ. Ашу буып барады», - деді Зеленский.
Биылғы көктемде жасалған соққылар нәтижесінде ресейлік әскерилер Харьковтың энергетикалық инфрақұрылымының едәуір бөлігін жойып тастады. Осылайша Украинаның екінші ірі қаласында электр қуаты өшірілді.
Ол өз сөзінде Украинаның одақтастары Иранның әуе шабуылынан Израильді қалай қорғаса, Украинаны солай қорғауға бірнеше рет шақырды.
Дүйсенбі күнгі кешкі үндеуінде Украина президенті Иран соққысынан кейін «бүкіл әлем Израиль мен көрші елдердің аспанындағы одақтастарының әрекеттерінен, егер бірліктің негізінде жеткілікті саяси ерік болса, терроризмнен қорғаудағы бірліктің қаншалықты мықты болатынын көрді» деді.
«Израиль НАТО-ға мүше емес, және де [НАТО-ның альянстың барлық мүшелерін ұжымдық қорғау туралы жарғысының] 5-бабын қолдану сияқты әрекет қажет болмады. Ешкім де соғысқа тартылған жоқ. Олар бар болғаны өмірді сақтап қалуға көмектесті», - деді Зеленский.
Жексенбіге қараған түні Иран Израиль аумағына 300-ден астам зымыран мен ұшқышсыз ұшақ арқылы шабуыл жасады. Израиль және батыс әскерлерінің мәліметтері бойынша, АҚШ, Ұлыбритания және Франция әскерилерінің қолдауымен осы снарядтардың 99%-ын атып түсірді.
Зеленскийдің сөзіне жауап ретінде Украинаның батыс одақтастары, оның ішінде АҚШ пен Ұлыбритания НАТО елдерінің әскери қызметшілері ресейлік әскерлермен тікелей қақтығысқа қатыса алмайды, себебі бұл шиеленіске соқтырып, кең ауқымды соғыс қаупін туғызады деп мәлімдеді.
